विराजच्या 'इट्स ईझी'ला नॉमिनेशन

विज्ञान आणि तंत्रज्ञानावरील विविध प्रयोग करीत असतानाच घरगुती कचऱ्याचे घरच्या घरी व्यवस्थापन कसे करता येईल , याचे उपाय सांगणारा लघुपट चिंचवडच्या विराज गपचूप याने तयार केला आहे. यंदाच्या सायन्स फिल्म फेस्टिव्हलमध्ये देशातील तीन उत्तम फिल्म्समध्ये त्याला नॉमिनेशनही मिळाले आहे.

विद्यार्थ्यांना विज्ञान-तंत्रज्ञान विषयाची गोडी लागावी , त्याबाबत उत्सुकता निर्माण व्हावी , यासाठी केंद्र सरकारच्या विज्ञान आणि तंत्रज्ञान विभागाच्या विज्ञान प्रसार अंतर्गत दरवर्षी सायन्स फिल्म फेस्टिव्हल आणि स्पर्धा आयोजित केली जाते. निर्मिती संस्था किंवा वैयक्तिक पातळीवर या स्पर्धेमध्ये भाग घेता येतो. मीडिया सेंटर , टीव्ही चॅनल , मीडिया स्कूलला देखील या स्पर्धेत सहभागी होण्यासाठी प्रोत्साहन दिले जाते. यामध्ये विज्ञान आणि तंत्रज्ञान विषयावर उत्तमोत्तम लघुपट दाखविले जातात. चिंचवड येथील विराज गपचूप याच्या ' इट्स ईझी ' या लघुपटाची निवड झाली आहे.

येत्या २०१३ मध्ये होणाऱ्या स्पर्धेसाठी सायन्स अँड टेक्नॉलॉजी फिल्म्स बाय स्टुडन्टस् या विभागात त्याच्या लघुपटाची निवड करण्यात आली आहे. घरच्याघरी कचरा व्यवस्थापन करण्याबाबतचा हा लघुपट आहे. देशभरातून तीन विद्यार्थ्यांच्या लघुपटांना नॉमिनेशन मिळाले आहे , त्यात विराजचाही लघुपट आहे. येत्या सात जानेवारी रोजी पश्चिम बंगाल येथे अभिनेता अमोल पालेकर यांच्या हस्ते या स्पर्धेचे पारितोषिक वितरण होणार आहे.
घरातील ओला कचऱ्याचा वापर करून केवळ खत तयार करण्यापेक्षा पालेभाज्यांची मुळे , फळभाज्यांना आलेले कोंब पुन्हा जमिनीत रुजवून त्याची बियाणे तयार करणे आणि पुनर्निमिती करण्याचा प्रयोग त्याने या लघुपटातून दाखविला आहे. या शिवाय पिकांवरील कीड रोखण्यासाठी आणि पिकांमधील प्रतिकात्मक शक्ती वाढविण्यासाठीचा उपाय त्याने सुचविला आहे. सुमारे साडेचार मिनिटांचा हा लघुपट असल्याचे त्याने सांगितले.